政情：吳安儀做清潔工 籲關注基層
清潔工人、保安員同速遞員嘅辛勞方便咗市民嘅生活同工作，但有冇人關心佢哋係咪在職貧窮？女子桌球世界冠軍吳安儀應樂施會關注基層勞工嘅「窮得只剩份工」視覺藝術展邀請，趁清潔女工杜建興（興姐）嘅公餘時間，走入興姐嘅世界，做咗成個下午嘅清潔工，一嘗搬動逾三百斤垃圾嘅勞動滋味。被傳媒形容為「香港之光」嘅吳安儀話：「興姐其實先係香港之光，因為好難想像無咗佢哋，平時我哋嘅生活會係點。」
工作嗰陣，興姐會將小型垃圾倒入直通地下垃圾房嘅各樓層垃圾槽，部分大型垃圾就用手推車搬運。出身基層嘅吳安儀坦言，無諗過興姐嘅工作會咁危險，佢嘗試將垃圾倒入垃圾槽時曾分心失衡、爭啲跌落地下垃圾房，而每日清理逾三百斤垃圾，對體力嘅需求都好大。
興姐日做九個鐘，時薪係最低工資三十二個半，扣除強積金供款後，月入只剩約八千二百元，約八成作為七口之家嘅開支，但為咗家人，佢敬業樂業，只係希望市民唔好喺佢工作時「掩口掩鼻」歧視。吳安儀都呼籲大眾對基層工友友善啲，同佢哋打招呼：「佢哋心入面會好甜。」「窮得只剩份工」展覽於本月十日至二十七日喺石硤尾賽馬會創意藝術中心舉行。