中環出更：街坊急召 鄺俊宇被蛇玩
今年冬天唔夠凍，所以連蛇都唔冬眠，外出玩樂一番。立法會議員兼元朗區議員鄺俊宇（Roy）前日收到街坊求助，話其區議員辦事處出面有蛇出現，阿Roy雖然驚，但面對一眾老弱婦孺，惟有頂硬上同條蛇對峙。不過，佢當然捉唔到蛇喇，仲畀條蛇玩番轉頭添，最後要警方派出蛇王解救。
阿Roy話喺聖誕新年長假期，佢主要都會留喺議辦處理地區事務。前日突然有街坊衝入議辦，話有蛇出沒，要求佢幫手。佢作為一個男丁，惟有幫手疏散人群，同埋報警求助。
與蛇對峙 捕捉失敗
警察到場之前，阿Roy都同條蛇對峙咗一段時間，佢形容條蛇好蠱惑，見有人就鑽入坑渠，但又不時伸個頭出嚟嚇人。佢曾經多次打算捉蛇，不過見條蛇咁蠱惑佢都係決定放棄，最後都係勞煩警方派出蛇王處理。阿Roy事後分析，條蛇睇落都似有毒，自己唔敢輕舉妄動係正確決定，又覺得街坊有蛇都搵佢，而唔係搵警察求助，證明地區工作做得好喎。
卓妮