中環出更:「豎」立威名 陳姵而妙韻推廣音樂

香港好多學生學樂器,但音樂氛圍卻不覺濃厚,好多時小朋友學樂器更變成一種升學手段,搞到好似被迫咁,難以享受其中。早前卓妮遇到上個月剛年滿九歲嘅豎琴小神童陳姵而(Pearl),七歲已考獲八級豎琴的她,過去一年勇奪多個國際賽冠軍,揚威海外卻絲毫無被強迫學習的感覺,Pearl仲話比賽前最鍾意喺後台「裝」吓有幾多觀眾,愈多人愈開心,言談間笑容天真爛漫。

好多人學樂器時都傾向閉門造車獨自練習,Pearl則樂於與人分享樂趣。早前新家園協會與菁英會及音樂堂慈善基金會合作舉辦「音樂無界限義教計劃」,免費義教一班小朋友吹色士風外,更搵嚟Pearl擔任香港青年啟發大使推廣音樂,增強本地藝術氣氛。

音樂堂慈善基金會創會聯席主席高松傑(Jacky)及張志仁指,Pearl除咗幫手於開幕禮及活動上表演外,更加入佢哋計劃內學生們之間嘅WhatsApp群組,等一班學音樂嘅同學仔有問題可以互相發問討論或指教,又認為本地學樂器嘅人雖然多,但音樂氣氛始終唔及其他地方好,希望這種形式令本港嘅音樂藝術氣氛更熾熱。

媽媽教路 勿強迫練琴

對於女兒年紀小小就踏足紐約卡內基音樂廳、英國皇家阿爾伯特音樂廳及維也納的音樂廳大樓等多個國際知名演奏廳,Pearl媽媽Selina就話學樂器冇得逼,要小朋友自己鍾意,記得有次阿女下晝考琴,上晝練咗七個鐘,結果考嘅時候已經「謝」咗,反而後來考試前睇吓電視輕鬆吓成績仲好。Selina又拒絕做怪獸家長,稱唔會管住阿女練琴練幾耐,只要求佢揀咗一樣嘢學就要學到尾唔好半途而廢,仲笑言同阿女去外國比賽時,會好興奮咁一齊用手機捉精靈添!

卓妮

第一手消息請下載on.cc東網iPhone/iPad/Android/Windows Phone Apps