政情：林作出書教英文溝女法

一年前出選黃大仙區議會龍星選區失利嘅「港姐男友」林作，敗選之後唔止繼續活躍於政界，更加喺唔同方面發展。本身畢業於牛津大學嘅佢，將會出書教人用英文識女仔，揚言「讀完本書，所有人都會曉用英文溝女」，將學英文同識女仔拉上關係，真係得佢先諗到喇！

林作話，新書雖然大玩「溝女」噱頭，但內容其實好認真，會教讀者常見嘅文法問題、口音同埋寫電郵方式，都好實用嘅。呢本處女作預計會喺二月出版，佢依家正積極趕稿，又話本書會用自己張相做封面，相信有佢個樣做生招牌實更加暢銷喎！

之前有傳林作有意出戰九龍西補選，佢坦言對從政好有興趣，雖然仍未決定係咪參選，但會繼續喺政界發展。佢又話，特朗普都可以當選美國總統，證明好似佢呢類亂噏當秘笈嘅人，喺政界有市場喇！