牛頭角時昌迷你倉奪命大火，敲響咗迷你倉火警危機嘅警號。消防處事後高調話會加強巡查，但竟然連全港有幾多間迷你倉都唔清唔楚，由事發後公布嘅不足四百八十幾間，尋日就補鑊話有八百八十五間，竟然同原先估計差近一倍，唔通消防處當初係靠估？迷你倉分布喺人煙稠密嘅市區，消防處事隔半年仍未巡查晒全港迷你倉，唔單止掃雷慢，仲要連有幾多呢類「都市炸彈」都唔知，處長李建日點做嘢o架！
