政情：今日你上鏡：張國鈞做Gym 黨友齊跟機

熱愛健身嘅民建聯（民記）立法會議員張國鈞（Horace，圖左），自成功減磅後，fit到漏嘅身形亦令唔少人羨慕。就連佢嘅黨友、油尖旺區區議會主席葉傲冬（圖右）都效法，仲去埋同一間Gym房操練，前日佢哋終於相遇，當然影番張合照。唔少黨友睇到佢哋嘅合照後，亦留言話想學佢哋去操練添！

葉傲冬前日喺facebook上載合照後，黨友立法會議員劉國勳即刻留言，話見到佢哋嘅操練成果後，都想去試吓，連沙田區議員李世榮都話想試埋一份。

立法會議員蔣麗芸亦有留言，叫劉國勳同李世榮唔好再諗，都去試吓操練喇！睇番張相，唔知係咪日子有功，Horace嘅身形比葉傲冬更fit，難怪有人留言話一個有效果、一個冇效果啦！

Horace早前為立法會選舉而秘密操練，由六月初開始就去健身，除咗健身，佢仲食埋由營養師所設計嘅餐單作配合，成功減咗超過廿磅。即使依家議會工作繁忙，佢亦都冇偷懶，保持「至fit身形」。

（互聯網）