政情：做牙醫被剝牙 梁世民嗌驚
牙醫幫病人剝牙就好平常，但唔知牙醫自己畀人剝牙又有乜嘢感覺？牙醫學會會長梁世民（Sigmund）就透露，以前都試過搵教授幫自己剝智慧齒，雖然實際上係唔痛嘅，但心理上都一定會驚，因為自己實在太清楚成個手術過程係點喎。
Sigmund話自己幫人剝牙剝咗咁多年，輪到自己剝嗰陣真係瞇埋眼都知對方下一步準備做啲乜嘢，淨係聽到啲聲都估到對方拎起緊邊一樣工具，幾時準備開刀咁，笑言如果唔知嘅話可能反而冇咁驚。
講起做牙醫經常都要長時間喺診所裏面工作，除咗面對病人同診所四面牆之外，都冇乜機會同其他人溝通，好多時積積埋埋嘅壓力無處宣洩，Sigmund就話的確會有咁嘅情況出現，所以點解要加入牙醫學會，因為除咗一啲技術交流之外，最緊要係有個空間畀大家一班同行互相認識同了解，仲可以順便大吐苦水，始終同行先最明白大家辛苦之處，最有共鳴，紓壓一流。