中環出更：行山遇懸崖 張華強頂硬上
好多人都鍾意行山，近年社交網絡上亦有好多行山好手不時分享新路線同靚景，吸引網民前往打卡兼影靚相。不過早前有報道指近排多咗發生行山意外，卓妮早前喺一個活動上見到香港青年工業家協會前會長張華強（Jacky）及太太Gigi，原來佢兩夫婦都係行山發燒友，仲曾有驚險經歷添！
呢日係香港青年工業家協會就職禮，Jacky卸任後由張傑接棒成為新一任會長。講開行山，Jacky早前夥拍協會內成員一齊挑戰毅行者，又定期一齊行山，Gigi就話每次佢哋行之前都會研究過條路線先，之但係總有百密一疏嘅時候，透露有次佢哋去外地參加一個行山活動，行到一半先發現原來有一截係懸崖峭壁嚟，要側住個身咁行，但行到半路又冇得返轉頭，惟有硬住頭皮頂硬上，諗番都覺得驚險。
陳婉珊籲量力而為
常務副會長陳婉珊（Clara）亦熱愛行山，佢話行山係健康同開心嘅事，但一定要揀啱適合自己能力嘅路線，量力而為，千祈唔好見人個個都行自己就去行，事前要衡量番體能同做足準備，新手可以請教吓行山經驗較豐富嘅朋友，咁就比較安全喇。佢又坦言自己比較鍾意行一啲「有路」嘅地方，「爆林」嗰種就唔啱佢喎。
對於行山，副會長陳嘉賢、執行委員林曉盈及陳家偉就有唔同睇法。林曉盈話自己平日較少行，更加未試過行啲險要路線，不過就試過有一次行山時見到猴子，嚇一跳喎！陳家偉就對行山冇乜興趣，反而鍾情滑雪，每年新年都會去滑雪旅行嘅佢，嚟緊會帶埋兩個小朋友一齊去咁話。
卓妮