講起敗家呢家嘢，港府認第二，二世祖都唔敢認第一。大家有眼見，大型基建固然延誤超支當食生菜，就算好似更換公屋晾衫架咁簡單嘅工程，當局一樣有本事搞到得物無所用，一換再換都唔掂，再咁落去，庫房多多錢都唔夠揈喇。
係人都知，沿用幾十年嘅公屋「三支香」晾衫架危機四伏，多年來不知有幾多居民因為晾衫而慘成空中飛人。迫於輿論壓力，前年房署終於跪低免費為公屋住戶更換新晾衫架，點知設計漏洞百出，唔止晾得四件衫咁大把，仲設喺廚房油煙位置，搞到媽聲四起。為咗補鑊，房署決定再花四億元為三十萬合資格住戶額外加裝晾衫架，即係前後使咗九億元咁滯，問你服未。
不過咁，如果以為官老爺會從錯誤中吸取教訓，咁就太傻太天真嘞。嗱，首批加裝工程明年初率先喺九龍灣彩福邨展開，房署近日展示新晾衫架嘅樣辦，結果唔睇猶自可，一睇把幾火。居民批評新晾衫架中間嘅Y形支架唔啱用，不便曬晾床單，而且房署規定住戶必須拆除自行安裝嘅晾衫架先至肯加裝，擾民兼嘥錢，唔少居民索性話睇定啲先，未必會畀房署更換喎。
咁又係呀，香港地少人稠，居住環境狹窄，晾衫成為日常生活一大難題，唔少人被迫將啲衫晾到通屋都係，再唔係就晾出走廊甚至街邊，都咪話唔頭痕。最弊房署官僚一味閉門造車，到頭來唔止解決唔到問題，反而添煩添亂。真係諗極唔明，整個晾衫架啫，又唔係移山填海咁大工程，有乜理由搞極都搞唔掂呢？如果官老爺肯稍移玉步，從冷氣房走入尋常百姓家，實地了解一下用家情況，又點會一次又一次搞出大頭佛呀？
好彩，香港勝在有第四權。經過本報介入，房署話會積極研究改良Y形支架嘅位置喎，呢啲咪叫四方木，唔踢唔識郁囉。冇計喇，港產官僚個個住喺堅離地城，身嬌肉貴，唔止家務有工人代勞，仲有大大個官邸花園畀佢哋晾衫，梗係唔知民間疾苦喇。見微知著，港府施政經常偏離民意，搞到焦頭爛額，依家知點解喇。
話時話，房署嘅混帳只係冰山一角咋，根本成個政府都係問題多多。唔信嘅，睇吓審計報告咪知囉，除咗房署、食環署、屋宇署呢啲「審計之友」，就連郵政、消防都一樣亂象叢生，幾乎冇一個部門係靠譜嘅。
都係古人講得啱，一室之不治，何以天下國家為。港府大事做不成，小事做不來，香港想唔亂都幾難。嗱，趁現屆政府任期進入尾聲，唔該所有庸官劣吏快啲捲鋪蓋走人，咪再靠害吖。