政情：帶團遊江西 陳琬琛被扣查
中央政府早前放寬部分立法會議員及政界人士嘅入境限制，支聯會副主席蔡耀昌隨即申請簡稱「回鄉證」嘅港澳居民來往內地通行證，仲去埋廣州玩。不過曾參與今屆立法會選舉、依家係選委會社福界選委嘅公民黨荃灣區議員陳琬琛，喺聖誕節當日帶團同街坊去江西遊覽三日，喺皇崗口岸出入境期間被內地公安截停扣查，仲被搜身同檢查隨身物品，被扣查兩個鐘後先放行。
坐足兩粒鐘 原因未明
陳琬琛透露，喺皇崗入境時畀幾個公安帶到一間房進行扣查，就連隨行嘅太太也被帶到另一房間扣查。佢話喺扣留期間，公安未有透露點解要扣留佢，亦有幾個公安喺房外守住。佢又話喺搜身期間，公安曾警告佢唔准亂郁，否則就將佢鎖起，而佢全程亦都冇得企，只可以坐足兩粒鐘。
結束江西遊覽行程，喺出境前，佢同太太交代要分開走，費事太太又被扣查，然而佢又再度被扣查，今次就連記事簿都要逐頁揭起嚟睇。但今次時間就短啲，大約半個鐘後就走得，帶佢走嘅公安仲同佢講，每日都有好多人被扣查，叫佢返港後低調處理。
佢話多年嚟都有帶團到內地遊玩，上次係今年五月底，當時過關順利，但經此一役，佢短時間內都唔會返內地，未來農曆新年期間嘅街坊團都唔會隨行，佢估計今次事件與佢曾參選立法會及選委身份有關。