政情：希思路機場打卡 齊昕秘密返英
喺行政長官梁振英（CY）早前宣布以照顧家庭為由，唔會爭取連任後，再次令香港第一家庭成為城中焦點。之後民建聯主席李慧琼（Starry）就大爆CY個女梁齊昕（齊昕）病情「係好差」，未幾特首夫人梁唐青儀出席公開活動時就爆seed否認事件，批評Starry嘅言論只係片面嘅認知、與事實不符，又大鬧她「武斷」，但事件主角齊昕就懶理所有傳聞，唔聲唔聲返咗英國。
齊昕尋日朝早未夠十點就喺facebook分享最新動態，喺英國希思路機場「打卡」，交代自己離開咗香港，已經返到倫敦，又話倫敦係佢嘅第二個家同最鍾意嘅城市。
齊昕嘅貼文甫出，即刻有唔少網民留言同讚好，亦有網民上載慰問卡，祝願佢身體健康，又叫佢要保重身體；但齊昕就冇透露今次係唔係自己一個人返英國。