政情：立會雪櫃「爆炸」出貼「勳」析成因
立法會區議會（第一）功能界別議員劉國勳嘅辦公室發生凍到「爆炸」事件！佢尋日喺facebook圖文並茂自爆，喺長假期後返回立會辦公室，一打開雪櫃就驚現「爆炸」現場，原因係雪櫃嘅溫度太低，搞到入面嘅罐裝梳打水「爆罐」。佢其後嘗試以物理角度解釋「爆炸」成因，即因乜原理會令到個罐變形，甚至被「撐爆」添。
溫度太低 梳打水爆罐
劉國勳接受查詢時話，今次「爆炸」事件於立法會辦公室首次發生，由於自己喺辦公室日日飲梳打水，所以雪櫃長期有好多罐梳打水，今次「爆炸」事件好在只有兩罐梳打水爆咗，另有五、六罐係完好無缺。佢自言，好彩啲同事於聖誕假期前一早已清理好雪櫃內嘅食物，如果唔係仲難清理。
之不過，佢講講吓又透露，原來細個都發生過同類「爆炸」事件，肇因係放汽水入冰格，但唔記得拎番出嚟，搞到雪櫃「爆炸」，由於汽水中有唔少糖分，所以記得當時好難清理喎。