綠色先鋒：童衣變布偶
父母多喜歡為新生嬰兒添置大批新衣，稍為破舊或不合身的舊衣物，往往當廢物棄置。其實只要稍花心思，即可賦予舊衣物「新生命」。一班熱衷針黹的義工媽媽，利用手中的一針一線，將回收得來的舊衣物，縫製成可愛的「小怪獸」布公仔，並於市集義賣，為慈善出一分力之餘，亦教育下一代有關減廢、回收和再造的環保價值觀。
「香港物質主義過盛，好多父母成日為小朋友添置新衫、新褲，仲將大部分舊衫褲當垃圾拋棄。」曾從事設計行業的Monster Cycles召集人梁韻芝（Celia）表示，留意到香港兒童衣物浪費問題嚴重，激發她將舊衣物回收再造的念頭，「針黹係我嘅興趣，所以就試用舊衫整公仔，仲吸引到一班有同樣諗法嘅媽媽，一齊去回收舊衫、設計同製作公仔，已經有大約二十個義工媽媽加入。」
運用想像力 源頭減廢
「公仔嘅設計概念，源自老一輩嘅百家被，寓意祝福小朋友快高長大。」每一隻「小怪獸」布公仔，均是由Celia和一眾義工媽媽利用回收舊衣物的布料，一針一線縫製而成，「整一隻公仔要用大概十二塊布，先用紙模確定尺寸，將外層嘅拼布縫好後，再塞棉花同加埋眼睛、手腳等細節，就大功告成！」布公仔義賣收益將全數捐贈至與兒童相關的慈善機構。
「除咗回收舊衫，亦有媽媽特意帶幾件好有紀念價值嘅小朋友衫，例如用過嘅口水肩、帽仔等，拜託我哋將啲衫製成公仔，畀小朋友一個驚喜。」 Celia期望小朋友透過與布公仔的互動，明白減廢、回收和再造的重要性，「與其白白浪費，倒不如運用想像力，將睇落冇用嘅舊衫舊褲變成有用嘅資源，為源頭減廢出一分力。」
運用舊衣物縫製布公仔的過程，除吸引一眾媽媽參與，小朋友亦樂在其中。帶同六歲女兒一同縫製布公仔的媽媽Rainbow認為，針黹能夠啟發小朋友的創作思維，「好多小朋友連揀布、落針都未試過，希望再有多啲機會，畀囡囡試吓DIY嘅樂趣！」
圖：朱偉坤
文：李耀宗