政情：幫囡囡戒公主病 陳恒鑌聖誕全家露營
大多數人都會趁住聖誕假期喺屋企開派對或者同家人外遊，但立法會議員陳恒鑌（Ben）就反其道而行，捉咗老婆同六歲嘅阿女離開鬧市，走入大嶼山露營。阿Ben話親近大自然唔單止可以減壓，更重要嘅係幫到囡囡戒除公主病。
笑稱治療功效顯著
露營向來唔係港人主流活動，既要辛苦孭住一大堆裝備行山，又要風餐露宿。阿Ben一家人亦係孭住沉重嘅背囊，去到位於大嶼山南岸嘅籮箕灣，去露營兼觀日，阿Ben仲喺野外一展廚藝，煮咗蜆湯暖身，又大讚囡囡孭裝備行斜路毫無怨言，甚至係無人打理嘅超臭旱廁都頂到，笑言露營對治療公主病功效顯著。
跟進營區河道污染
阿Ben仲話聖誕假期市區周圍都係人，正係郊遊好時機，但佢自問係露營新手，只係識搭營同煮飯，而囡囡係第二次陪佢露營，仲對郊遊愈來愈感興趣添！
佢又不忘指出，雖然籮箕灣風景靚，但露營區欠缺設施，包括排污系統，令營友不得不將洗潔精同廢水倒落河道，造成污染，話之後會喺立法會幫手跟進。郊遊兼實地考察，一舉兩得。