政情:揼本搞fb專頁 波哥恨like

網絡世界係宣傳嘅大趨勢,唔少政界人士都意識到唔可以放過呢個途徑,尤其係建制陣營起步較慢,更加格外重視,甚至不惜落重本,即使連任多屆嘅立法會保險界議員陳健波(波哥),亦落力搶攻網絡世界,十月喺社交網站facebook(fb)開設專頁,除咗聘請專人打理外,仲使咗逾三萬蚊買軟硬件配套,認真係做足準備,但係部分影片只有數百個點擊,睇嚟仍需努力。

添置電腦相機 注重執相

根據波哥嘅薪金津貼申報表,佢大花萬一蚊買咗部新電腦,仲買咗部近一萬蚊嘅相機,相信都係買嚟搞好fb。除咗硬件外,佢亦以約一萬蚊買咗三套軟件,包括影片製作、動畫製作同執相軟件,相當尊重版權喎!講起執相軟件,波哥仲預先畀成四千幾蚊用一年。網友成日話「你的樣子如何,你的日子也必如何」,睇波哥咁注重執相,睇嚟佢開始明白網友留意啲乜嘢嘞!

不過,萬事起頭難,波哥嘅fb搞咗好多欄目,有時事台、保健台、投資台同保險台等等,兼且落重本搞,但係專頁目前只有兩千幾人讚好,而大部分影片嘅點擊率仍唔算太高,一啲較正經嘅影片,例如講吓財委會、強積金或醫保,大部分點擊率仍未過千。相反,保健台講點沖杞子嘅影片,點擊率就有一萬三千幾,唔通網友鍾意睇啲輕鬆議題,例如點樣養生多啲?

馬逢國買空氣清新機

另外,睇番其他議員嘅申報,除咗買電腦、文具、簡單家具外,都有買一啲大家未必諗到嘅嘢。例如民建聯嘅議員柯創盛就用咗兩千幾蚊,買咗一套音響。至於之前嫌記者喺立法會會議廳外食飯,搞到「好大陣味」嘅體文界議員馬逢國,就用咗兩千幾蚊買空氣清新機。馬逢國對氣味咁敏感,買空氣清新機都唔算出奇,但唔知佢自己嘅辦公室附近,今屆突然出現咗啲乜嘢要辟味呢?

第一手消息請下載on.cc東網iPhone/iPad/Android/Windows Phone Apps