中環出更:赴台播獨 黃之鋒死撐正常交流

三名主張本土自決嘅立法會議員朱凱廸、姚松炎及羅冠聰,連同香港眾志秘書長黃之鋒獲邀下月初赴台,出席台獨組織「時代力量」主辦嘅論壇。朱凱廸早前接受訪問時稱,獲邀時以為係私下對談,並唔知係公開活動,但黃之鋒尋日出席一個論壇前話,獲邀赴台時已知有公開同非公開嘅論壇,強調主辦單位並冇改變說法,言論同朱凱廸有所出入。

論壇主題講自決

被問及佢哋此行引起勾結台獨勢力疑雲,但黃之鋒則認為羅冠聰作為立法會議員,與其他國家立法機關代表有交流屬正常不過嘅事,而且之前亦曾與英、美、台嘅立法委員或國會議員交流咁話。但係個論壇主題係講自決,佢哋又同台獨組織嘅立委對講,咁仲唔係去播獨,竟然仲死撐係正常交流。

之後,佢喺論壇上大談身份認同,認為與個人日常生活、成長經歷有關。佢話曾經出現唔批回鄉證申請同禁止入境嘅事件,質疑「入都入唔到,叫我哋點認識」,但佢就重申冇打算申請,因為相信去內地都會被監視同跟蹤,若然連基本人身自由同安全都冇,係「入都費事入去」。

同場仲有立法會議員梁美芬,佢手持特區護照大讚好用,又認為持特區護照者,喺法律上就係中國公民。佢更批評用「香港國」貼紙遮蓋護照係無知,行徑等同曾灶財以圖畫自稱皇帝一樣。

卓妮

第一手消息請下載on.cc東網iPhone/iPad/Android/Windows Phone Apps

_