政情：特首夫人爆seed鬧李慧琼
特首梁振英（CY）早前宣布，為咗要照顧好家庭，所以唔會爭取連任，令到一向備受全港市民關注嘅香港第一家庭又再次成為焦點。身兼民建聯主席嘅立法會議員李慧琼（Starry），日前出席網台節目時曾經提及CY女兒梁齊昕病情「係好差」，但尋日特首夫人梁唐青儀出席公開活動時突然爆seed，點名批評Starry嘅言論係片面嘅認知、與事實不符，甚至大鬧佢「武斷」。
當日Starry接受網台訪問時話：「據我了解佢（齊昕）嘅病情係好差」。愛女心切嘅梁太尋日出席香港女童軍嘅活動時兩度回應，話「齊昕（健康狀況）好好」，但就冇再透露詳情。
批私下揣測 對言論表遺憾
之後梁太就突然「爆seed」，大爆話其實喺Starry發表言論前一星期，佢哋一齊食過飯。佢仲話喺飯局中無提過齊昕嘅病情，只係話齊昕健康狀況好好，所以佢唔明點解Starry要咁講，仲批評話「對於佢喺一啲片面嘅認知，下一啲咁武斷嘅評論，我對佢嘅言論係表示遺憾」。
跟住梁太又話相信特首唔會評論自己內部家事，或者係子女嘅健康狀況。佢批評：「我相信李議員係一己私下嘅揣測。」被問到Starry嘅言論係咪涉及政治因素，梁太直頭叫記者問番「李議員」，睇嚟佢今次真的動怒了。
李慧琼另指齊昕與母關係差
畀梁太點名大鬧，Starry越洋回應話，樂意知道齊昕身體好好，亦衷心祝願佢早日康復。事實上，Starry當日除咗講齊昕病情，仲有評價齊昕同梁太嘅關係，話佢哋「唔啱」係事實、甚至「係人都知」，唔知係咪因為咁而觸怒咗梁太呢？
老實講，始終係人哋嘅家事，佢哋更加唔想揭開肚皮畀人睇，其他人亦唔應該指手畫腳，但係Starry唔知喺邊度聽到嘅消息，仲要好似大喇叭咁公開唱，畀人公開鬧，根本係自己攞嚟衰。正所謂禍從口出，Starry經此一役，睇怕應該更加慎言，收下把口，講少句喇！