辭職等待中央批准的財爺鬍鬚曾，睇怕因等中央批准望到頸長都未見有聲氣，惟有過海飛髮，鬍鬚曾在其網誌話佢從九十年代開始一直幫襯同一間理髮店，理髮師傅在店內工作逾四十年，憑熟練的手勢及周到嘅服務，不但無被時代淘汰，而且近年愈來愈多年輕人和大學生光顧，係真定假啊？年輕人和大學生都未必係咁富貴嘅「中產」，依老朽所接觸嘅年輕人，多數幫襯五十蚊嘅「快剪」或索性自己剪，基於鬍鬚曾年年財政預算案都估錯數，多年下來估錯數高達五千億元，「史上最廢財爺」錯判環境又何必大驚小怪？
當然，鬍鬚曾係想借題發揮，佢最想表達嘅係「有質素的服務，能抵禦時代洗禮」，之後佢筆鋒一轉，又提到佢剛在手機下載社交軟件Instagram，學習利用新的社交平台與年輕人溝通；佢形容這是擁抱新事物和新科技，同時亦珍惜一切美好的傳統；當然，鬍鬚曾之意在於佢相信，人和事，無論新與舊，只要具質素，都會在任何時代得到大眾喜愛。
鬍鬚曾顯然陶醉於自己的「高民望」而有這番偉論，之但係，佢無論如何穿梭於傳統和現代，都始終是一個無能嘅「守財奴」，若然他成為下一屆特首，咁香港未來經濟前景及發展，睇怕不是企定定喺度，亦會是倒退幾十步！
鬍鬚曾嘅民望，老朽一早認為係虛火。再講，歷史學者薩孟武說過，在中國歷史上，奪帝位者不外兩種人，一種是豪族，如楊堅、李世民；一種是流氓，如劉邦、朱元璋。老朽亦因而悟道，造王者亦當不會是如鬍鬚曾此等「中層」，歷史上的造王者，頂多也是不第秀才，鮮有如鬍鬚曾在官場之一帆風順；更多是草包如陳勝，沒多少才學卻膽敢揭竿起義喊出：王侯將相寧有種乎？像鬍鬚曾這種愛喝咖啡看法國電影的中產，衝衝紅燈也許不至出事，不過，要謹記一次意外，足以致命。