中環出更：婦女會聖誕晚會泰國小姐撐場
香港台灣婦女協會（婦女會）早前舉行聖誕慈善晚會，旅港一眾台灣靚女齊齊悉心打扮歡聚。最新出爐嘅泰國小姐季軍亦戴住后冠出席，原來佢係婦女會主席歐陽珍囝囝章馳嘅女友，今次專程由泰國來港支持未來奶奶，令現場生色不少。
卓妮見春風合唱團指揮曹樹華同靚女電影監製蘇文麗好好傾，原來蘇文麗監製嘅一部講述男女平等主題嘅電影獲得國際獎項，套戲仲未喺香港上映，但係曹樹華急不及待氹蘇文麗喺屋企放映，畀好友先睹為快喎！信奉佛教嘅蘇文麗話套戲係佢嘅上師仁波切投資，喺不丹拍攝，因為不丹設備不足，所以返到香港做後期製作。佢笑稱套戲故事好感人，風景亦好靚，搞到佢都唔捨得剪添！
戴于程落力推廣棒球
香港少棒聯盟冠軍教練戴于程都喺度，佢十二年前獲香港棒球總會邀請來港做教練，後來創辦俱樂部教本地青少年打棒球。棒球喺台灣好受歡迎，但喺香港就屬冷門運動，不過戴于程稱讚香港球員好認真、吃苦，實力亦唔錯。佢哋曾赴台參加少棒比賽，仲打敗過台灣隊添！
台灣同鄉會會長林華琴亦有到場，佢好開心話，幾年前佢聯同亞洲聯合財務董事總經理張炳煌、同鄉會前會長賴李承美等好友，喺灣仔買咗個寫字樓物業，每月以象徵式租金租給同鄉會使用。日前其中六名業主決定將持份以一元賣給同鄉會，讓台灣嘅同鄉可以有個固定嘅家。該物業現時嘅市價都值過千萬，真係唔講得笑。
卓妮