政情:公民講場:退保民意一面倒 小肥張死撐錯覺

政府早前就退休保障進行諮詢,逾一萬八千份意見書當中,有九成人支持全民退保。勞工及福利局局長張建宗(小肥張)就大唱反調,提醒市民唔好以為有九成人嘅傾向,就以為好多人支持,仲叫大家唔好有錯覺添!佢解釋,係因為有部分支持嘅意見書當中,市民係以範本形式提交,即係喺意見書上簽名或加咗少少自己嘅睇法。佢又強調唔好只係睇個數量,意見書嘅質素都好重要。被問到會唔會畀人話「漠視民意」,佢就死撐話質同量都重視,但質就可以反映到唔同人嘅睇法,而量化就會有一定嘅偏差咁話喎。呢啲咪叫官字兩個口,任佢點講囉!

第一手消息請下載on.cc東網iPhone/iPad/Android/Windows Phone Apps