政情：范國威翻兜 再做新同盟召集人
青年新政游蕙禎同梁頌恆早前被法庭裁定取消立法會議員資格，九龍西同新界東嘅立法會議席需要補選，早前喺立法會新界東選舉連任失敗嘅新同盟范國威（Gary），就盛傳有意出戰補選。Gary尋日同將軍澳區議員鍾錦麟及大埔區議員任啟邦，一同獲選為該黨輪任召集人，唔知道Gary今次翻兜做召集人，係唔係為補選鋪路呢？
新同盟尋日召開新一屆會員大會，選出Gary 、鍾錦麟同任啟邦為召集人。據了解，該黨通過將半年一任嘅輪任召集人改為八個月一任，同時將輪任召集人由四人改至三人，首任召集人係任啟邦，Gary會喺明年九月開始接任，最後係鍾錦麟。
為補選鋪路 下年九月始輪任
其實，新同盟喺一○年成立後，喺一一年初召開首次會員大會，其時係西貢區議員嘅Gary已被選為輪任召集人，而輪任制度嘅一大作用，係避免權力過度集中喺個別成員，滋生「大佬文化」。
由於該黨黨章規定，輪任召集人唔可以係立法會議員，Gary依家翻兜此職，係咪代表佢唔會出戰立法會補選？Gary接受查詢時就話，若然召集人真係當選為議員，就會進行替補改選。佢又承認自己由下年九月先開始輪任，係為咗避免任期同立法會補選撞期，而佢目前仍然密切留意形勢，積極考慮參與補選。