政情：波叔撩交打 未開會先開戰

憂礙工程進度 打擊建造業

波叔尋日又做鍵盤戰士，寫網誌提及工務工程撥款申請。佢話政府本立法年度將會向立法會提交三十九個新工程項目，申請約九百億元撥款，而立法會工務小組委員會後日將會開會，審議今屆會期內首批工程項目撥款申請，包括東涌及大埔兩個公營房屋項目嘅工地平整同基建工程，同埋將軍澳一棟服務設施大樓工程。

佢又舊事重提，話自從二○一三/一四年度起，部分議員嘅「拉布」行為，令政府工作舉步維艱，舉例最經典係二○一三/一四年度，政府原先預計向立法會申請約五百億元新工程撥款，但最後只獲批三十六億元，之後每年情況都非常唔理想，拉布拖慢工程開展進度，打亂招標時間表，搞到建造業界無所適從，影響從業員飯碗。佢呼籲新一屆立法會可以摒棄過去「拉布」歪風，實事求是審議撥款申請，令工程如期推展，市民盡快享受成果。

都未交手，波叔就作此勸戒，應該預咗會有反效果。民主黨（白鴿黨）立法會議員「峯鴿」許智峯就批評波叔無喇喇走出嚟「挑機」，話依家都冇聽過有人要對任何嘢拉布，就算將來真係要拉布，都係針對一啲爭議性大嘅議題，例如之前嘅醫委會改革，但呢啲議題暫時都未見影，「唔知佢（波叔）係咪心裏面知道政府認受性低，做咩都容易被人反對，所以早啲出定口術。」

峯鴿又話，波叔作為一個看守政府內嘅民望低官員，應該「出少句聲當幫忙」，唔好再四處辣火頭，「議會尊嚴依家已經好低，大家都係想返去議事啫！」