中環出更：仔女老師通水 黃楚恒買禮物出貓
嚟到十二月中聖誕派對可謂一浪接一浪，早前潮州商會青委會（潮青）舉辦聖誕派對，其他團體嘅青委都出席捧場，非常熱鬧。講起好多人鍾意聖誕除咗因為可以一大班朋友聚埋一齊，仲可以有禮物收！不過有人有禮物收，即係有人要送禮物，卓妮見到有五個小朋友嘅中總青委主席黃楚恒，唔知佢買聖誕禮物畀小朋友時又有冇勁頭痕呢？
黃楚恒笑笑口話學校嘅老師好識做，會叫啲小朋友填聖誕願望畀聖誕老人，跟住偷偷哋畀番佢哋呢班父母睇，但佢話有時望住張紙仔都未必估到個小朋友寫乜，串錯字不時發生，今年佢就知阿仔寫咗太空船嘞！
李嘉莉打破宿命抽中獎
呢日現場有樂隊演奏增加氣氛，見台上面擺放咗唔少樂器，青委主任章曼琪就諗起以前都有玩開電子琴，事關佢中學時每位同學都要學一種樂器，佢仲同已故歌手陳百強跟同一位老師學添，不過就笑言老師話佢同陳百強天分差好遠囉！
青委會委員李嘉莉呢日一開波就好幸運咁抽到支威士忌，但佢自爆平日冇乜抽獎運，除咗聖誕節之外抽中獎嘅次數幾乎係零喎！除咗抽獎，唔少人仲會選擇交換禮物，東華總理馬清揚就話嚟緊會同啲仔女及幾個朋友家庭一齊去滑雪兼交換禮物，話如果收到唱K神器就可以即刻一齊玩喎。
同場仲有廠商會青委會主席顏明秀及姐姐顏明潤、潮青副主席龔雅璇、名譽參事張俊勇、參事張少鵬及委員馬竣耀等。家族經營玩具生意嘅顏明秀話，細個媽媽例牌送機械人畀佢砌，稱係六神合體，後來先知原來嗰啲係拆散咗嘅貨辦，唔怪得永遠砌唔到，認真大整蠱。
卓妮