政情:「足球小將」張國鈞 棄體育揀學業

立法會議員張國鈞平時一身官仔骨骨,以配合佢律師嘅專業形象,但其實佢非常熱愛運動,除咗定期健身,踢波腳法都有番咁上下水準添!張國鈞話,以前讀書時有踢開波,踢邊個位置都應付到,所以中學時期體育老師曾經推薦佢入讀體育學院嘅前身銀禧體育中心,希望佢可以喺運動方面闖出一番成就。不過,佢最終都係選擇專心讀書,唔知係咪覺得體育難以維持生計呢?

雖然張國鈞冇修讀體育,但仍然好鍾意睇波,仲係車路士球迷,以前去英國旅行時仲曾經專登安排行程去朝聖,入場感受吓熱鬧氣氛。講開踢波,原來佢同立法會足球隊都有一段緣。佢話立法會足球隊曾經好缺人,佢試過以外援身份幫手,依家佢進身立法會,梗係要第一時間加入立法會足球隊啦!

第一手消息請下載on.cc東網iPhone/iPad/Android/Windows Phone Apps