政情：張永森患病 泛民或突襲
從政者最大嘅敵人相信係病魔，事關身體唔好，就算有多少名利都可能無福消受。據悉今年初當選深水埗區議會主席嘅張永森，早前請假冇出席區議會大會，據稱更一度同外界失去聯絡，事後有傳張永森患上大病，因此惹嚟區內人士質疑，能否履行工作繁重嘅區會主席職務。張永森尋日透過助理回覆指，自己請咗病假，多謝關心，但未有透露病情。
張下月擬重出江湖
張永森患上大病嘅消息備受外界關注，原因係同深水埗區會內形勢有關，事關該區建制同泛民區議員數目係十二對十一，前者僅以一票之差取得區會主導權，若然張永森未能主持大局，一批泛民區議員或會趁機突襲通過臨時動議，而根據《區議會條例》，區議員如未得區議會同意而連續兩次缺席區議會大會，更會即時喪失議員資格。
據了解，張永森早前曾患上大病，目前正在休養康復，有最近見過張永森嘅政界中人透露，張目前比較消瘦，但仍然「行得走得」，據知張永森爭取出席下月區議會大會主持會議。