中環出更：「智」囊雲集 培養青年體藝文化
由金利來集團副主席兼行政總裁曾智明等帶頭嘅一班城中年輕領袖，早前成立咗一個新嘅青年組織「香港廣東青年總會」，日前舉辦成立暨第一屆會董會就職典禮，仲搵埋「鋼琴王子」李雲迪任文化大使及「跳水王后」吳敏霞擔任體育大使，連帶會董會內都多咗啲唔同界別嘅臉孔，淨係副會長都幾十個，會董名單更加係成頁紙咁長。
執行主席霍啟山話，目的係想設立一個平台加強粵港兩地溝通，令人才可以透過向北發展向上流動，提升文化及體育等方面嘅氣氛。常務副主席之一嘅郭基煇指今次廣東省有成二十多個地級以上嘅青年組織加入，成員眾多。
郭基煇赴日 踩三日單車
講起近排有乜嘢搞作，不時跑步跑樓梯嘅郭基煇就話早前去咗日本沖繩踩單車，踩咗成三百幾公里咁多，每日踩一百公里左右，踩足三日，覺得非常放鬆，因為踩單車嘅時間佢真係覆唔到電話WhatsApp、電郵等，可以真正完全放低工作咁話。
卓妮見佢旁邊仲有同樣運動細胞好強嘅副主席鄭泳舜，有個稱號叫跑步王嘅佢之前仲曾經參加過鐵人賽添！對於早前政府為樓市「加辣」，雙倍印花稅率劃一加至百分之十五，鄭泳舜就覺得二手樓市場受到好大影響，可以話萎縮咗，而一手樓嘅成交就還好，因為市場上嘅置業需求仍然存在喎。
講到想增加多啲體藝文化的氣息，主席曾智明就話佢哋今次搵咗著名音樂監製伍樂城做會董兼作咗首會歌，而總會亦有唔少女士加入，包括十二個發起人之中唯一女性林月萍擔任副秘書長兼常董，仲有常務會董何超蓮等等。
卓妮