中環出更:「丁權係佛地魔」 肥尹惹波叔反擊

《哈利波特》系列中,大魔頭「佛地魔」無惡不作,更成為魔法世界中嘅禁語,唔能夠直呼呢個名。而喺尋日嘅立法會會議中,立法會議員尹兆堅(肥尹)就質疑依家出現咗「佛地魔」。

批評丁屋政策「掂都唔掂」

肥尹認為政府過往處理同諮詢咗唔同具爭議性嘅工程,但丁屋政策卻「掂都唔掂」,所以質疑丁權就係「佛地魔」,而其黨友議員林卓廷亦都有類似質疑,質問政府係咪為維護原居民嘅特權,所以先無處理丁屋問題,連公眾諮詢都無膽做。

發展局局長陳茂波(波叔)就反擊,批評肥尹混淆視聽,又解釋當局需要集中精力於短中期土地供應,推展各新發展區等工作,而丁屋問題涉及法律、環境、土地用途規劃、不同利益持份者等,所以丁屋政策檢討唔係當局工作優先選項。

波叔又批評林卓廷指控毫無根據,大多數發展局嘅工作範疇廣泛,好似地政規劃、海濱發展、文物保育、樹木管理等,所以工作一定小心衡量去定次序,強調現時嘅優次係最合適。佢更重申,其政策目標並非為原居民尋覓足夠土地起屋,而現時單係透過土地供應去限制丁屋發展,已經畀原居民「鬧到死」,所以狠批林卓廷講廢話,睇嚟丁屋呢個「佛地魔」都搞到波叔兩面不是人喎。

卓妮

第一手消息請下載on.cc東網iPhone/iPad/Android/Windows Phone Apps