政情：公民講場：丟低爛帳劈炮 鬍鬚曾難依靠

明年一月特首梁振英（CY）將會公布佢任內最後一份施政報告，而緊隨其後嘅就係二月下旬發表嘅財政預算案，主責預算案嘅曾俊華（鬍鬚曾）前日辭去財政司司長一職，諗住衝紅燈選特首。正所謂牽一髮動全身，CY尋日都話鬍鬚曾辭職對政府有好大影響，事關依家係撰寫施政報告同籌備預算案嘅關鍵時刻，而預算案係為施政報告服務，要有連貫性嘅，依家做到一半，鬍鬚曾竟然劈炮唔撈，根本係置七百萬市民嘅福祉於不顧，佢丟低嗰盤爛帳仲要搵人幫佢孭，佢咁嘅行徑完全係不負責任，市民又點會相信佢有承擔呀？