政情：陸頌雄林卓廷 中學鬥波結緣
工聯會嘅立法會議員陸頌雄（Michael）同民主黨（白鴿黨）嘅議員林卓廷（阿廷）身高逾六呎，原來佢哋喺中學時期仲曾經鬥過籃球！Michael大讚阿廷打波好勁，但阿廷就不斷提起Michael嘅隊友打波好勁，完全唔記得咗Michael，言下之意，即係……
原來佢哋分別就讀屯門嘅兩間中學，相差一屆，同為籃球校隊成員，中四、五時曾同場比賽。後尾阿廷都有打圓場，話Michael入得校隊都應該勁嘅，佢哋仲開始傾吓係咪要組織立法會籃球隊添！
周浩鼎棹忌畀人嗌阿叔
阿廷又講起同囝囝去街場打波，啲o靚仔叫佢「傳波呀！阿叔」，路過嘅周浩鼎（Holden）就話，自己好忌人叫佢做阿叔，對方仲係五歲小朋友。阿廷就忍唔住講「大佬，係叔父輩啦！我都就嚟四十咯！人哋十幾歲，唔係叫你阿叔叫你咩呀？」Michael都忍唔住話「唔係叫你uncle叫咩呀？」當阿廷知道Holden三十七歲，仲話佢如果好命，「孫都生到個添！」如果真有其事，真係算好命？