政情：西瓜琦認無能 激嬲死忠網民

被取消立法會參選資格嘅梁天琦，成功將「Plan B」嘅梁頌恆送入立法會，然而梁頌恆引發宣誓風波以至佢被法庭裁定取消議席期間，梁天琦一直潛水，更被嘲為「西瓜琦」，及至近日先高調現身，仲為退出「港獨」議題鋪路。

「當初上街撐你 依家討厭你」

梁天琦尋日喺fb發文話，如香港係命運共同體，佢個人嘅成敗得失唔重要，指「與其為虛榮而掙扎，自我膨脹，倒不如坦率地面對自己的無能，才可於荒謬及無常中活下去」。其實，佢早前接受本地傳媒訪問時，已講過「自己仲係好廢，好多時候都係得個噏字」。

唔少網民對梁天琦呢番說話好憤怒，紛紛留言狂插佢。有網民直斥佢欺騙支持者，「說好的時代革命呢？」、「由當初上街撐你，到依家討厭你」；部分人則批評佢同與青政嘅作為，「你既然知道自己無能，咁你當初又搞個plan b出嚟做咩？」、「為何要等到青政永不翻身才上水？」