政情：建制漏夜冧友向泛民復仇

龕場草案委會 19人變33人

上一屆立法會休會前，食物及衞生局本來有兩條草案排緊隊等大會表決通過，當中包括涉及醫務委員會改革同骨灰龕嘅草案，但最終都因為泛民拉布，拖死咗醫委會改革，就連本來無爭議嘅骨灰龕草案亦慘受牽連。雖然局方早已預告新一屆立法會喺十月開鑼之後，就會重推骨灰龕草案，但今屆立法會一開波就遇上宣誓風波，癱瘓咗個幾月先開始重回正軌，《私營骨灰安置所條例草案》委員會要拖到今日先開首次會議。

立法會秘書處尋日下晝再更新委員名單，翻查紀錄後發現，委員數目喺一夜之間由本來十九人增加到三十三人，建制派與民主派比例則變成廿三對十，消息指建制派將派出民建聯（民記）陳克勤出選主席，預料泛民委員將唔能夠包攬委員會正副主席。

民記嘅陳恒鑌解釋，今次唔係食衞局出手要求佢哋漏夜冧友，而係因為日前泛民玩突襲漏夜冧友加入墟市事宜小組委員會，最終令劉小麗同郭家麒成功當選正副主席。

民記嘅蔣麗芸亦表明，建制派漏夜冧友係為咗回應「泛民擺明車馬做啲咁嘅嘢」，佢哋亦已經有共識，之後喺其他委員會，包括亦係今日選主席嘅《（2016年公眾衞生（動物及禽鳥）（動物售賣商）（修訂）規例）（生效日期）公告》小組委員會，將會繼續冧友，以防泛民再度突襲，誓要保持建制派喺各委員會嘅主導權；佢又透露民記葛珮帆將出選上述委員會主席。

建制派早已表明希望草案能盡早通過，快啲規管到私營骨灰安置所，避免骨灰龕場「無王管」嘅情況，即使今次泛民冇迹象會發難阻延草案通過，建制派亦會瞓身為草案護航。泛民上次突襲成功，後果就係之後無偈傾，條數到底應該點計，相信要泛民自己先知。