政情：中出羊子邀助選 梁天琦淆底
青年新政梁頌恆同游蕙禎早前被法庭裁定取消立法會議員資格，加上劉小麗即將面臨政府就其議席嘅司法覆核，或有多個議席需要補選。立法會選舉期間曾因支持港獨而被取消參選資格嘅中出羊子，早前就揚言要參與九龍西補選，更加手持「毛語錄」證明自己唔支持港獨，佢前日又喺失蹤多時嘅本民前發言人梁天琦facebook（fb）上留言，邀梁天琦助選，但梁天琦反問「仲嚟？」似乎怕咗咁喎，唔通係見過鬼怕黑？
梁天琦早前被選舉主任裁定取消參選資格之後，積極為其「Plan B」梁頌恆助選，梁頌恆當選之後，梁天琦就銷聲匿迹，唔單止絕迹網絡世界，更遠走加拿大。佢早前返港後，似乎再次活躍，日前就喺fb貼出三年前佔領行動時嘅照片，中出羊子隨即留言，邀請梁天琦幫佢助選，但梁則以「仲嚟？」拒絕，亦有網友話中出羊子搵梁天琦助選等同支持港獨，背「毛語錄」都無用。
遭網民揶揄「講獨」
除咗中出羊子邀助選之外，唔少網民都喺梁天琦嘅fb上留言，好壞參半，有網友質疑佢係「講獨」而唔係「港獨」，又斥佢走佬去外國讀書，亦有人指會繼續支持佢。