政情：林鄭 鬍鬚曾 狗咬狗骨
再有港府最高層內訌暗戰！政務司司長林鄭月娥（林鄭）前日出席論壇發表演說，期間特別提及香港過去十年嘅經濟增長只有百分之三至三點四，不及新加坡過去十年嘅平均增長或增長趨勢嘅百分之六，直言對此感到唔甘心，被外界解讀為指摘財政司司長曾俊華（鬍鬚曾），過去十年負責推動本港經濟發展不力。正喺北京嘅鬍鬚曾尋日隔空否認香港較新加坡輸蝕。其實現屆政府只剩番約七個月任期，林鄭同鬍鬚曾身為管治團隊重要成員再次狗咬狗骨，管治理念矛盾公開浮面，港人睇怕都要自求多福。
林鄭前日以「香港新願景」為題發表臨別贈言，歷時廿幾分鐘，言談間雖然無點名批評鬍鬚曾，但係多處內容均意有所指，疑將矛頭指向鬍鬚曾負責嘅工作範圍，林鄭除咗有不甘心香港發展不及新加坡嘅言論，自言「香港應該做得更好」，又希望在座每一位都唔好滿足於或者接受呢個就係香港嘅經濟前景。
兩人中港隔空開火
對於林鄭「不甘心論」隔空開火，鬍鬚曾尋日隔空回應話兩人相識多年，形容林鄭直率、認真，過去冇談及有關事情。之後又解畫話新加坡近年大面積填海同輸入外勞，香港喺上述兩方面均有限制，佢又否認香港比新加坡「輸蝕」，重申唔少機構均肯定香港競爭力。
不過林鄭發炮不絕，佢之後談及現屆政府喺福利方面嘅投放，表示對於有百分之五十五嘅福利增長，感到非常之驕傲，直言「如果有人認為我們是花多了、花大了，我歡迎同佢進行辯論」。有政界中人分析，林鄭有關言論疑似向鬍鬚曾叫陣，呼應有意見批評鬍鬚曾係「守財奴」，一直以審慎理財為由拒絕投放更多資源喺有需要嘅範疇。
管治團隊屢現分歧
事實上，港府最高層管治團隊過去一段時間多次出現內訌同唔對嘴，除了今次林鄭同鬍鬚曾隔空有火藥味，喺兩個多月前引爆嘅橫洲發展爭議，港府最高層互相推莊更加難睇，身為橫洲項目小組主席嘅特首梁振英率先卸膊，話橫洲發展細節問題應由鬍鬚曾領導嘅土地供應督導委員會跟進，鬍鬚曾隨即反擊話自己根本未曾出席小組會議。林鄭亦發出新聞稿劃清界線，話自己並非小組及督導委員會成員。港府最高層咁唔同心同德，完全做唔到心無二用，餘下任期睇怕只會有更多隔空開火嘅場面出現。