政情：CY落區 人氣不再 怨氣滿載

免被狙擊 fb「獨家報道」

CY喺出任特首之初，都有帶同「三寶」落區聽意見，但幾乎每次都被狙擊，場面混亂失控，後來無疾而終。喺今個月初，大家都係喺CY個人facebook（fb）發現，原來佢封塵咗多年落區聽意見嘅場面再度出現，先後去咗荃灣同北區。

尋日係禮賓府開放日，佢先同太太梁唐青儀去花園同市民傾偈、自拍，佢仲主動同啲家長講下學年幼稚園有免費教育，兩人留咗十幾分鐘就離開，之後就見到CY攞住本簿出去，仲多咗件新道具：平板電腦。

佢今次第三度落區係去九龍灣出席大專青年協會交流會，當然又係閉門（口架）喇！民建聯（民記）觀塘區議員顏汶羽喺交流會完結後，喺fb話接受咗青年團體邀請同特首交流意見，與會者仲有民記嘅立法會議員柯創盛，同埋前議員陳鑑林添！三次交流會都係閉門形式進行，甚至冇通知傳媒，要喺fb先得知消息，唔知係咪怕被狙擊呢？

范太加把口 叫促進人和

依家除咗退休法官胡國興同民建聯前成員胡世全，宣布參選特首外，其他疑似人選都未表態。全國人大常委范徐麗泰尋日出席電台節目時，認為下屆特首需要改善香港敵我分明嘅兩極局面，又話如果CY有意競逐連任，可以喺促進人和方面花多啲工夫。佢認為喺未曾決定參選前有人放風造勢，大家應認清傳言不能當事實，參選人要得到一百五十張提名票，成功入閘才能作準，否則只能當係娛樂新聞。

再講，CY去完交流會返回禮賓府時，又特意提早落車同市民自拍，又提多次免費幼稚園教育，但被問到關於連任，佢同太太都冇回應，只係笑而不答同點頭。