笑看天下:知識難改命運

在一個不確定和反智的年代,說知識可以改變命運,竟變成「無厘頭,屙奶油」,最簡單的例子,便是香港立法會出現好幾個小學雞議員,有大學未畢業者依然可以做月薪近十萬元的「尊貴議員」,而網上有大埔「村屋床位出租」廣告:九十呎房間,上格床位月租三千二百元,下格床位月租三千六百元;據說是主攻剛畢業的大學生,希望為佢哋打造一個如同大學宿舍嘅空間!

大學生家陣淪落成咁,有些未畢業就去輪候公屋,有些連租住劏房也無能為力,要租住床位,難怪見財化水嘅「扑嘢議員」所講的「就算我哋依家想去扑嘢,都搵唔到房去扑」引來咁大回響。

有人指出,以前只有單身失業漢才需要租住床位,但今天竟然是大學生。其實這也難怪,根據各大專院校畢業生薪酬調查統計,平均維持在九千至一萬五千元水平,這起薪點和十多年前分別不大或只有微升,然而絕對追不上通脹升幅。如果畢業又要還貸款,一份微薄薪水,即使少去食日本嘢、睇少場電影、不去日本旅遊,在衣食住行樣樣貴之下,難免捉襟見肘,睇怕要申請在職低收入津貼,想買樓?發夢啦!想娶老婆?發夢啦!唔好話「港女」,即使內地女同胞,冇層樓鬼嫁畀你,真係令香港大學生情何以堪!

知識改變命運,原來又係呃人嘅,而內地的情形亦不遑多讓。有論者說,這是一個真理輕易崩塌、信念總是動搖的時代,「讀書改變命運」就是一個受害者。隨之倒下的是「知識就是財富」、「學好數理化,走遍天下都不怕」等風行一時的教育勵志口號,取而代之的是「畢業就失業」、「科研窮三代,讀博毀一生」、「高中生拖累全家,大學生拖垮全家」。時代在變,香港的怪獸家長勿再相信甚麼贏在射精前,依老朽看,沒孩的父母最幸福。