政情：警跟埋入廁所「不便」 林榮基撤銷人身保護
前銅鑼灣書店店長林榮基喺今年七月聲稱被人跟蹤，搞到七一遊行「甩底」，事後要求並獲警方提供人身保護。不過，林榮基尋日出席活動時透露，原來佢喺九月底已主動要求警方撤銷其人身保護，原因係覺得不方便。林榮基話，唔習慣「去廁所都有個人企喺隔籬」，對警方嘅人身保護感到不便，所以主動要求撤銷人身保護。
稱對香港治安有信心
其實警方七月時就林榮基嘅情況作評估，已指出無實質證據顯示其人身安全受到威脅，但基於其個人憂慮同公眾對事件非常關注，先決定提供人身保護。林榮基又話，對香港治安有信心，參與公開活動後回家，會轉多幾次車保障人身安全。
已打消移民台灣念頭
對於早前曾稱有意移居台灣，佢話已打消移民念頭，指自己係香港人，會繼續在港發展，但強調唔會再開書店，但正考慮投身時事評論。