政情：游梁攞盡津貼 隨時嘔凸

宣誓前已經發放

我哋早前收到讀者報料，指游蕙禎、Baggio同埋香港眾志立法會議員羅冠聰各向立法會申領咗八十三萬四千多元嘅營運資金，當中包括四十五萬九千多元可申請預支嘅「辦事處營運開支、酬酢及交通開支」，同埋三十七萬五千元嘅「開設辦事處及資訊科技開支」，為可申領嘅最高款額，即係佢哋都攞到盡。而立法會秘書處亦先後喺九月同十月，即立法會就職宣誓前已發放相關津貼。新當選議員需要預支津貼設立辦事處同購買器材、設備固然無可厚非，不過游蕙禎同Baggio兩人議員席位危危乎，隨時要嘔番晒啲錢出嚟。

對於游蕙禎同Baggio一旦喪失議員資格後係咪要退還津貼，甚至議員薪金，幾位立法會行政管理委員會成員就有唔同意見，其中體育、演藝、文化及出版界立法會議員馬逢國就話，議員津貼同薪金都係公帑，如果佢哋兩人喪失議員資格，秘書處就應該向佢哋追番啲錢，就算係已經用咗嚟買嘢，佢哋都應該有所交代，將買咗嘅嘢交番畀秘書處咁話。

被質疑「大花筒」

另一成員陳克勤就話，佢哋喺宣誓前已經申領咗有關開支，而當時佢哋確係有權去申領，但萬一喪失議員資格就可能要回水。克勤又質疑佢哋大花筒︰「斷估佢哋應該未開辦事處，如果淨買資產項目都攞盡就好過分喇。」不過如果佢哋已經租咗地區辦事處，又要畀按金，又要請人，應該要使好大舊錢。到時又要回水畀秘書處就真係嘔凸喇。

資訊科技界議員莫乃光亦都話，一開始申領晒「開設辦事處及資訊科技開支」真係「用得好快」，佢自己上一屆四年都用唔晒，不過佢就覺得好難叫佢哋兩個回水，佢亦都唔同意咁做，因為游蕙禎同Baggio就算冇得做議員，都只係因為完成唔到宣誓，並非存心詐騙，佢哋都冇呃錢企圖，而議員都唔係預要帶錢返工喎！本身係律師嘅議員謝偉俊就估計，候任議員係有資格申領津貼嘅，用咗就未必追得番，至於薪金同之後嘅開支，就要睇佢哋喪失議員資格嘅生效日期係幾時喇！