中環出更：廿人踩場 怒踢「漢奸黎」洩憤
壹傳媒黎智英（漢奸黎）被揭發多次秘密捐款畀民主派政團同立法會議員，喺九月立法會選舉仲公然邀請民主黨「乳鴿」到其寓所，幫佢哋拉票。尋日就有一批市民到漢奸黎寓所外示威，不滿漢奸黎黑金禍港、操縱選舉，仲將漢奸黎張相貼喺西瓜膠波上，用腳狂踢洩憤。
尋日朝早十一時許，約二十名男女自發到漢奸黎位於何文田嘅寓所，佢哋部分人手持印有「反港獨、反暴力、政治黑金操縱選舉禍害香港」、「漢奸走狗賣國賊」等字眼嘅標語同橫額，亦有人手持五星旗大叫口號示威。
撕毀漢奸黎肖像
示威者嗌完口號之後，就拎咗一個貼咗漢奸黎照片嘅西瓜膠波出嚟，仲即時大力用腳踢以洩憤，警員一度到場了解。示威者逗留至中午十二時就自行離去，但到下午二時又折返。佢哋之後又撕毀有漢奸黎肖像嘅橫額，之後逗留到三時先至離開。
自六月十日起計，針對漢奸黎嘅抗議行動至今已踏入一百四十九日，連同尋日行動在內，到漢奸黎寓所外及將軍澳壹傳媒大樓外嘅示威行動最少達七十八次，當中自稱霸王國際集團員工及苦主嘅佔十次、正義聯盟佔三次，旅遊業界及其他人士則有六十五次。
卓妮