政情：逃兵「忠」辭職 問責避重就輕

街工執委冇乜人關注

事後有唔少網友狠批阿忠做臨陣縮沙嘅「逃兵」，要求身為超級區議會議員嘅佢問責辭職，順勢迫使政府舉行超級補選，就梁君彥做主席、特首選舉，以至港獨等議題進行全港性嘅變相公投。

街工前晚喺社交網站宣布，阿忠真的辭職了！不過佢唔係辭任議員，而係辭去冇幾多人會關注嘅街工執行委員職務，仲表明係同當日「立法會主席選舉的過程」有關。奇怪嘅係，「逃兵」事件明明係阿忠嘅個人表現問題，但竟然同時有另外三名執委跟隨佢一齊辭職。

因應有關變動，街工執委會將提前喺今年十二月至明年一月期間進行改選。至於本來嘅改選應該喺幾時進行？阿忠會唔會辭完職又重新選，當一切都無發生過？貼文並無提到，相信大家亦唔會太關心。