政情：鄭文聰澄清工總梁君彥冇內訌
工業總會（工總）早前去信其業界代表兼立法會主席梁君彥，喺高等法院就政府提出嘅司法覆核聆訊有結果前，唔好再安排青年新政立法會議員游蕙禎同梁頌恆宣誓，其後梁君彥就改變決定，被外界視為向梁君彥施壓。
工總主席鄭文聰早前出席工總活動時就澄清，業界同梁君彥並無內訌，當日出聲明係支持梁君彥主席，出聲明唔一定係壞事，自己同梁君彥亦都有緊密聯繫。
稱業界一直支持梁決定
鄭文聰話，曾經有會員問佢，點解工總會被指內訌，問到鄭文聰都搲晒頭，佢話當時覺得主席「好陰功」，咁多人鬧佢，而業界一直支持梁君彥嘅決定，即使最初佢安排游梁二人宣誓，業界唔想，但亦支持佢，明白梁君彥嘅決定係基於其立法會主席嘅身份，並唔係基於佢嘅個人意見去做事，佢嘅決定有其原因。
佢又話其後各界要求游梁道歉，兩人都唔做嘅時候，業界希望唔好畀佢哋宣誓，而梁君彥亦係咁決定，業界亦一致支持佢，唔覺得同梁君彥嘅關係有問題，只係大家太敏感嘞！