政情：李國棟「升呢」 做國際組織主席
香港醫學專科學院主席李國棟醫生除咗係美食專家外，大家都忽略佢「正職」係私人執業家庭醫學專科醫生。最近佢「升呢」，前日正式當選為世界家庭醫生組織（WONCA）候任主席，係繼約二十年前「香港家庭醫生之父」李仲賢醫生後，再有港人擔此重任。
花半年時間四出拉票
正身處巴西出席WONCA會議嘅李醫生話，雖然有擔任WONCA行政會成員兼名譽司庫嘅經驗，但亦唔可以輕敵，所以佢今次花咗六個月時間備戰，四出拉票。佢笑言︰「唔會好辛苦，大家都係老朋友。」全球已經有五十萬名家庭醫生加入WONCA，身為港人能擔此重任，佢感到好榮幸，相信有助推動香港同中國發展家庭醫學，並提升家庭醫生喺醫療系統嘅影響力。
李醫生今次遠赴巴西競選，亦不忘抽空品嘗當地嘅美食佳餚，寓工作於娛樂。