政情：峯宇同怒衝保安 白鴿精神分裂

傳二人受黨友批評

梁、游前日硬闖立法會會議，兩人首次衝入會議廳後，峯鴿同其他本土自決派議員一度協助梁頌恆與保安員糾纏，鄺俊宇亦有上前。惟其後會議轉場至會議室，梁、游再硬闖，並與保安員發生激烈衝突，白鴿黨就冇人參與。該黨喺下晝召開記者會批評青政議員行為，但峯鴿同鄺俊宇都冇出席。有消息指峯鴿同鄺俊宇都因為協助青政而被黨友批評。

涂謹申尋日喺電台節目上話，梁、游前日衝擊會議室嘅行為需受嚴厲批評，又斥責兩人未有顧及他人安全，令保安員受傷。佢又透露，青政從來唔坐低同其他泛民商討，感覺佢哋討厭部分泛民議員，尤其係白鴿黨。

由於峯鴿同鄺俊宇前日有協助青政二人，而峯鴿亦曾喺區議會會議與保安員衝突，白鴿黨被網民質疑係「精神分裂」。該黨副主席兼立法會議員尹兆堅就話，黨團曾就前日衝突事件商討，又稱該黨並非不抗爭，過往亦曾參與公民抗命，「但唔係爭取民主就殺人都得」，黨友都有此看法，只係「程度問題」。佢又為峯鴿解釋，指佢喺區議會與保安員嘅衝突係「一人對一班保安」，而唔係青政前日咁「破城式衝入去」。被問到日後會唔會唔參與衝擊，佢就話要視乎情況，唔能夠一概而論。

羅健熙鋪路做主席

另外，白鴿黨尋晚召開特別會議大會，以一百零五票贊成、四十七票反對及兩票棄權，大比數通過「黨政分家」嘅建議。黨主席劉慧卿指出，黨友喺黨政分家嘅原則上冇大分歧，而黨政分家將係該黨未來嘅發展方向，期望將來可以由一個有能力嘅人接任主席。

有指黨政分家係為該黨副主席「乳鴿」羅健熙接任主席鋪路，而通過黨政分家建議將令佢出選主席時有更多籌碼。身在海外嘅羅健熙就話，正考慮出選主席，短期內會有決定。