中環出更:市況淡靜 商界百變應對

卓妮日前喺一個酒宴上見到多名商界人士,傾開現時經濟不景,唔知商界有乜嘢求變之道?原本有十幾間百家匯分店嘅百家企業主席呂樂偉話,百家匯原本係走生活小家電路線,後來因為網購熱潮而慢慢發展為生活百貨店,如今市道唔好加上網購熱已退,所以今年已關閉三間分店,佢亦趁勢清貨,決定將業務重新回歸小家電同數碼產品。呂樂偉話,與其行雜貨路線,不如專攻特定市場。

香港逸榮投資董事長吳聖傑就睇好咖啡前景,正構思引入即磨咖啡自動販賣機,只需花費十幾蚊,唔使一分鐘就有一杯香口咖啡飲,啱晒頻撲嘅香港人。身兼內地最大專業建材網站綠城電商執董嘅吳聖傑話,早前佢喺杭州一個展覽已試過擺幾部咖啡機,反應唔錯,增加咗引入香港嘅信心,預計最快於今年底就可以喺醫院同展覽場地試吓反應。

講番宴會現場,出席嘅仲有香江國際集團董事長楊孫西同親家香港福建同鄉會永遠名譽會長莊哲猛、啱啱當選中華總商會副會長嘅楊孫西兒子楊華勇、香港鐘表業總會秘書長蔡宗富同香港收藏家協會會長唐卓敏等人。法國名酒軒尼詩家族第八代傳人Maurice R. Hennessy亦有現身。

楊孫西用珍藏交換禮物

眾人皆知楊孫西唔止鍾意飲酒,亦係品茶專家,咁啱Maurice亦非常喜歡中國茶,所以楊孫西就送上自家珍品「海西一號」大紅袍靚茶,Maurice則回贈靚酒提早為佢賀壽,將宴會氣氛推上高潮。

卓妮

第一手消息請下載on.cc東網iPhone/iPad/Android/Windows Phone Apps