政情：八網難逃：宣傳車違泊 謝偉俊話唔知
立法會選舉已過，九龍東議員謝偉俊（Paul）架宣傳車就畀人影到停泊喺雙黃線。有自稱係「謝議員選民」嘅報料人士提供照片，見到車身有Paul肖像兼招牌「法律超人」圖案，同以英文寫咗謝偉俊立法會議員嘅七人車停泊喺銅鑼灣駱克道嘅雙黃線路段，報料人就批評係阻礙交通，知法犯法，但張相係幾時影就唔知喇。
「架車一向司機揸」
阿Paul就話，其實架車一向都係佢司機揸嘅，佢乜都唔知，張相又冇影到佢上落車，話係key圖都得喎，佢仲講笑︰「捉姦要捉在床，唔係搞唔到離婚o架。」不過，Paul最後都係同司機了解過，佢司機就話應該唔係停車或泊車，而係等緊前面架車開走喎！