政情：零裝備孭B巡地盤 丘文俊畀老婆詐型
房屋署多個新落成公共屋邨要延遲入伙，沙田水泉澳邨二期就係其中之一。沙田區議員丘文俊尋日就去到水泉澳邨第二期嘅月泉樓、映泉樓地盤視察，但佢竟然孭埋得兩個月大嘅囝囝去兼且玩自拍，照片中遠處嘅工人都要戴安全帽，但佢兩仔爺就零裝備。唔少網民都戥佢哋牙煙，話唔應該帶BB去，就連丘文俊都直言畀太太詐型。睇嚟呢位新手爸爸湊仔仲有待改善。
丘文俊解釋，因為太太尋日唔得閒，所以佢要負責湊住囝囝，又諗住帶囝囝去行山，所以先順便經過水泉澳邨睇吓。佢都知帶住BB唔應該去地盤，所以就冇入地盤，只係喺外圍視察，沿路都有唔少街坊同佢囝囝玩。
湊仔 行山 巡區一齊做
一向行開山嘅丘文俊視察完地盤就帶囝囝行由水泉澳到沙田坳十二笏村嘅一段行山徑，因為嗰度都係佢嘅選區，可以湊仔、行山、巡區三樣嘢一齊做喎。
不過，因為孭住十三磅重嘅囝囝，平時行廿分鐘路程，就變咗要行一個鐘先行完，真係辛苦晒喇。