政情：陳健波玩fb 「貼地」教投資
網上世界已經成為主流，特別係年輕人嘅平台。一直與網絡「絕緣」嘅保險界立法會議員陳健波亦要適應潮流，最近開facebook（fb）並請來專人打理，第一擊就係向後生仔講解強積金投資攻略，並附上潮語hashtag，擺明強攻年輕人市場。
輕鬆路線 動畫配潮語
上屆擔任財務委員會主席因強硬作風而獲得「重力波」外號嘅陳健波，明言其fb帳戶將會行輕鬆路線，唔會涉及太多政治。作為保險界功能界別議員，佢喺fb設立咗「波哥投資台」，以強積金教學文打響頭炮，配以動畫短片，講解唔同風險強積金嘅分別同回報。而為咗拉近同年輕人嘅距離，該教學文更附上大量潮語及Hashtag，包括「很重要，所以說三次」、「戴頭盔」、「你不理財，財不理你」等，明顯主打年輕人路線。
短片預告下次會介紹唔同種類嘅強積金，陳健波更透露正籌備喺fb製作杞子專輯，教人如何食杞子食得健康，分享養生之道喎。唔知佢幾時教埋年輕人買樓呢？