政情：冧友後遺症 梁美芬連退六委會
今屆立法會一開始，泛民主派、本土派及建制派因為喺協調事務委員會正副主席之位未能取得共識，要「冧友」加入委員會爭奪正副主席，搞到每個委員會閒閒哋有六十人。大戰過後，日前開始有泛民同建制派議員去信退出委員會，其中議員梁美芬更一口氣退出六個事務委員會，睇嚟退會潮仍會持續一段時間。
未列原因 全獲接納
身兼司法及法律事務委員會主席嘅梁美芬，尋日連發六封信，分別要求退出財經、公務員及資助機構員工、經濟發展、房屋、工商、發展事務委員會。梁美芬喺信中並無列明退會原因，只係話「不便之處，敬請海涵」，六個申請都各自獲相關委員會主席接納，梁美芬成為首個退出委員會嘅建制派議員。
另外，泛民議員方面，秘書處尋日亦向議員發文件，指公民黨毛孟靜以「議會工作有所調整」為由，去信要求退出環境事務委員會，並獲該會主席兼黨友陳淑莊接納。唔少人都話，一個議員要兼顧十幾個委員會根本無可能，所以一選舉完委員會正副主席，將會陸續有議員退會，只係邊個肯帶頭退會先啫。