立法會主席梁君彥上任唔夠一個月，多次被質疑有漏報個人利益。梁君彥臨到確認要選主席時最後一刻先入紙放棄英國國籍，已經被指對英國依依不捨，早前佢更被傳媒揭發，冇申報持有兩間英國公司股份，但佢至今都冇解釋漏報嘅原因，只係「偷偷」向秘書處補報持有股份。
梁君彥本月七日向秘書處申報佢擁有十一間公司股份嘅實質權益，之後被揭發佢漏報持有從事成衣貿易嘅 SUN HING （UK） LIMITED及47 ONSLOW GARDENS LIMITED等兩間英國有限公司嘅股份。佢喺本月十九日回覆傳媒查詢時話，若有漏報會盡快補救，又指若有不滿可以向議員利益監察委員會投訴。
梁君彥高調反擊後，喺同日下晝三點幾，無聲無息地向秘書處補報自己持有兩間英國公司嘅股份，但至今都未向傳媒解釋漏報嘅原因。
對於梁君彥放棄英國國籍一事，有非建制派議員尋日收到英國駐港總領事館嘅回函，除咗表明唔評論個案之外，並指有關文件有鋼印無簽名亦可，間接確認梁君彥提供畀議員睇嘅文件有效。