政情：體重超260磅張華峯唔敢驗身

肥老闆透露，上屆選舉前係最肥嘅時候，曾試過二百八十幾磅，其後因選舉曾下跌三十幾磅，當選後又再回升，今屆選舉就跌咗十幾磅，希望一直保持落去。佢話依家五十二吋腰兼有「三高」，要食藥控制，但佢只會做一樣運動，就係行路，唔敢游水，怕去到泳池，會畀小朋友笑。

做嘢後食完消夜即瞓

其實佢讀書時曾試過一百七十多磅，即比依家瘦近一百磅，之後出嚟做嘢，養成食完消夜就瞓嘅習慣，「堅持咗十年」，導致體重直線上升，不過佢已經戒咗消夜嘞，但係提到大閘蟹，佢仍好熟悉行情，話今年平咗好多，因為內地打貪，內銷少致貨源較充足，睇嚟佢又準備消滅「蟹貨」嘞！

講起美國大選，肥老闆估計即使特朗普當選，本港股市即時反應亦只會跌一千多點，長遠亦唔會有太大影響，因特朗普都係生意人，全球依家都同中國做生意，估計基於經濟考慮，都唔會有太大影響。至於早前立法會行政管理委員會年報顯示，立法會投資收入蝕咗五百幾萬元，佢話係因為恒指跌咗千幾點喎！