政情：八網難逃：長毛地鐵捽腳 乘客側目
立法會議員用交通工具出入並非奇事，但社民連議員梁國雄（長毛）一張乘搭港鐵嘅相片就惹嚟廣泛討論，原因係佢唔理儀態兼衞生，公然喺港鐵車廂內捽腳，咁核突嘅行為又難怪會令人側目！
從相片可見，身穿黑色衫褲同波鞋嘅長毛，鬆開左腳鞋帶，然後將右手食指插落波鞋鞋踭內係咁抓。而坐喺長毛右側嘅女乘客，更用手掩住口鼻，好似擔心會聞到臭腳味咁。
網民指似露宿者
相片亦都吸引唔少網民熱烈討論，有人鬧爆長毛冇公德心，亦有網民直指長毛為垃圾，又形容佢似露宿者，用語相當負面。其實車廂屬於公眾地方，任何人都應該注重車廂環境淨潔，立法會議員就更加要注重自己嘅行為，長毛今次真係斷正喇！長毛就否認捽腳，話只係拉高對襪喎！
（讀者提供）